Ndërtesat publike të fuqizuara nga panelet diellore, 6 sisteme voltaike u dorëzohen dy bashkive në Shqipëri
Gjashtë sisteme fotovoltaike diellore iu dorëzuan zyrtarisht bashkive Klos dhe Dibër.
Këto instalime, nga të cilat përfitojnë gjashtë ndërtesa publike, përfshirë shkollat e mesme, kopshtet dhe ndërtesat e bashkive, nënvizojnë ndikimin e prekshëm të zgjidhjeve të qëndrueshme të energjisë në komunitetet lokale.
Me një kapacitet total të instaluar prej 542 kWp, sistemet fotovoltaike në Dibër, Klos, Shkodër dhe Përmet, janë planifikuar të reduktojnë ndjeshëm emetimet e karbonit me rreth 20 mijë tonë gjatë jetës së tyre 25-vjeçare, duke siguruar akses me energji të pastër dhe të gjelbër.
Zbatuar në kuadër të projektit “Transformimi i Tregut për Përshpejtimin Fotovoltaik të Energjisë Diellore në Shqipëri”, financuar nga Qeveria e Japonisë dhe zbatuar nga PNUD në bashkëpunim me Ministrinë e Infrastrukturës dhe Energjisë dhe Agjencinë e Efiçiencës së Energjisë, pushtetet vendore, ky projekt synonte të përshpejtonte tranzicionin e Shqipërisë drejt burimeve të rinovueshme të energjisë.
Me një financim prej 859 mijë dollarë nga Qeveria e Japonisë, projekti mbështeti zbatimin e angazhimeve të Shqipërisë për Ndryshimet Klimatike në përputhje me Marrëveshjen e Parisit, duke forcuar angazhimin e vendit për zhvillimin rezistent ndaj klimës.
Ndërtesat publike të fuqizuara nga panelet diellore: Ceremonia e dorëzimit bashkon palët e interesuara.
Ambasadorja e Japonisë në Shqipëri, Kato Kikuko, nënvizoi se “në qendër të këtij projekti qëndron mbështetja ndaj përpjekjeve të Shqipërisë për dekarbonizimin dhe përshtatjen ndaj ndryshimeve klimatike”.
“Shpresojmë që instalimi i sistemeve diellore fotovoltaike në të dyja bashkitë të kontribuojë në diversifikimin e burimeve të prodhimit të energjisë, përveç hidrocentraleve në Shqipëri. Ai do të kontribuojë gjithashtu në një sigurim të qëndrueshëm të energjisë elektrike dhe një zhvillim të qëndrueshëm ekonomik në Shqipëri”.
Më tej, bën me dije ai “do të përshpejtojë zbatimin nga Shqipëria të Kontributeve të Përcaktuara Kombëtare (NDC)”.
Përfaqësuesja e Përhershme e PNUD-it në Shqipëri Monica Merino theksoi se “ky projekt është një kontribut solid në drejtim të zbatimit të Kontributeve të Përcaktuara Kombëtare”.
“I jam mirënjohëse qeverisë së Japonisë për partneritetin dhe mbështetjen e saj të vlefshme, jo vetëm për Shqipërinë, por edhe për vendet e tjera anembanë globit, në përpjekjen tonë kolektive për të ndërtuar një të ardhme neto zero. Qeveria e Japonisë është një partner kryesor i PNUD-it dhe luan një rol të rëndësishëm në përkthimin e premtimeve të klimës në veprime me ndikim dhe të prekshëm në terren”.
Nëpërmjet mbështetjes së synuar të politikave, instalimeve pilot në ndërtesat komunale dhe iniciativave për zhvillimin e aftësive, projekti synonte promovimin e energjisë diellore si një nga burimet kryesore të energjisë së rinovueshme përveç hidrocentralit.
Duke përdorur ekspertizën japoneze dhe teknologjitë e përparuara, projekti rriti aftësitë teknike dhe nxiti sipërmarrjen brenda sektorit të energjisë diellore. Ceremonia e dorëzimit në Bashkitë e Dibrës dhe Klosit simbolizoi bashkëpunimin e suksesshëm midis Japonisë, PNUD-it dhe aktorëve vendas në avancimin e synimeve të zhvillimit të qëndrueshëm.
Në përputhje me qëllimet e përshkruara në COP26 (Konferenca e Palëve në UNFCCC – Konventa Kuadër e Kombeve të Bashkuara për Ndryshimet Klimatike), UNDP përmes iniciativës së premtimit për klimën përsëriti angazhimin e saj për të mbështetur vendet në përkthimin e objektivave NDC në nisma të zbatueshme. NDC i përmirësuar i Shqipërisë, i paraqitur në tetor 2021, demonstroi një angazhim të vendosur për të reduktuar emetimet e gazeve serrë dhe për të përqafuar zgjidhjet e energjisë së pastër.
Potenciali transformues i energjisë diellore ishte tashmë i dukshëm përmes dhjetë projekteve pilot të zbatuara në bashkitë e Dibrës, Klosit, Shkodrës dhe Përmetit, duke rezultuar në rritjen e aksesit në energji për mijëra qytetarë shqiptarë.